<div dir="auto" style="text-align: justify;"><span style="font-size: 12pt;">على مدى الشهر اللي فات استعرضنا مع بعض إيه أسباب استمرار الفقر في مصر بل وزيادته مؤخرًا لدرجة وصوله لأعلى نسبة من السكان على مدى العشرين سنة اللي فاتوا حسب أرقام الحكومة (أكثر من تلت الشعب أصبح تحت خط الفقر). </span><span style="font-size: 12pt;">اخترنا نعمل المناقشة دي علشان بنسمع كتير ان احنا فقرا قوي، بس مش بنسأل كفاية "احنا فقرا ليه".</span></div>
<div dir="auto" style="text-align: justify;"><span style="font-size: 12pt;">وعلشان الأمم المتحدة مخصصة 17 أكتوبر من كل سنة لليوم العالمي لمحاربة الفقر، </span><span style="font-size: 12pt;">في (حلول للسياسات البديلة) احنا مؤمنين إن الفقر مش قدر..ومش حتمي..ومش صدفة..ومش غلطتنا. </span><span style="font-size: 12pt;">الفقر بيكون بسبب إجراءات الحكومات بتاخدها، أو بسبب ان الحكومات مش بتعالجه بالطرق المناسبة.</span></div>
<div dir="auto" style="text-align: justify;"><img style="display: block; margin-left: auto; margin-right: auto;" src="https://api-aps.aucegypt.edu/uploads/tinymce/1601479999image0.png" alt="" width="700" height="368" /><span style="font-size: 12pt;">هل علشان المصري كسلان بيحب القعدة ع القهوة والمصانع مش لاقية عمال؟</span><br /><span style="font-size: 12pt;">الواقع ان المصريين بيشتغلوا كتير، أكتر من عدد ساعات العمل القانونية. أقل محافظة في مصر من حيث ساعات العمل، وهي الأقصر، العاملين فيها بيشتغلوا 46 ساعة في الأسبوع. وده لأن أجور المصريين ضعيفة، فبيشتغلوا بدل الشغلانة اتنين، أو يشتغلوا عدد ساعات أكتر من القانوني في نفس الشغلانة. ومع ذلك، فعدد العاملين الفقراء بيزيد سنة بعد سنة. يعني رغم كل الشغل ده، هم بيفضلوا فقرا.</span><br /><span style="font-size: 12pt;">يعني بنشتغل وكتير.</span></div>
<div dir="auto"><img style="display: block; margin-left: auto; margin-right: auto;" src="https://api-aps.aucegypt.edu/uploads/tinymce/1601480045image1.png" alt="" width="700" height="367" />
<div dir="auto" style="text-align: justify;"><span style="font-size: 12pt;">هل علشان مصر بلد فقيرة في مواردها؟</span></div>
<div dir="auto" style="text-align: justify;"><span style="font-size: 12pt;">الحقيقة مصر ولا بلد فقير ولا بلد غني.. مصر دولة متوسطة الدخل. وفيه دول شبهها في الدخل بس نسب الفقر فيها أقل زي بنجلاديش والأردن وتونس.</span></div>
<div dir="auto" style="text-align: justify;"><span style="font-size: 12pt;">لكن مصر فيها عدد كبير من الفقراء وعدد صغير من الأغنياء قوي.</span></div>
<div dir="auto" style="text-align: justify;"><span style="font-size: 12pt;">مصر ثالث أكبر دولة في العالم من حيث اللا مساواة في الثروة. 5٪ من المصريين عندهم ثروة بتعادل تقريبا كل اللي بينتجه المصريين في سنة، في شكل عقارات وأراضي وشركات في البورصة وكمان بيسلفوا الحكومة. وفيه ستة مصريين من أغنى 100 في العالم.</span></div>
<div dir="auto" style="text-align: justify;"><span style="font-size: 12pt;">أما الموارد الطبيعية، فمصر عندها النيل و2000 كم من البحار، علشان كدة هي المفروض تكون غنية بالأسماك. وعندها وفرة نسبية في الأراضي الزراعية والمزارعين، وكمان عندها غاز طبيعي وبترول.</span></div>
<div dir="auto" style="text-align: justify;"><img style="display: block; margin-left: auto; margin-right: auto;" src="https://api-aps.aucegypt.edu/uploads/tinymce/1601480095image2.png" alt="" width="700" height="367" /><span style="font-size: 12pt;">هل علشان المصريين بيخلفوا كتير؟</span><br /><span style="font-size: 12pt;">أعلى 10 دول في العالم من حيث عدد السكان، مصر مش من ضمنهم. فيهم الدول الغنية والدول الفقيرة.. يعني مش شرط علشان عدد السكان الكبير تبقى الناس فقيرة. فيهم أمريكا واليابان وروسيا والصين والبرازيل.. وكل الدول دي متقدمة أكتر من مصر، ونسب الفقر فيها أقل من مصر.</span><br /><span style="font-size: 12pt;">الحقيقة ان أحسن طريقة علشان الناس ماتخلفش كتير هي رفع مستوى المعيشة. يعني الزيادة السكانية هي نتيجة للفقر. وكل ما بيزيد دخل الأسرة بيقل عدد الأطفال في الأسرة. وده بنشوفه حصل في معظم الدول اللي بقت متقدمة.</span></div>
<div dir="auto" style="text-align: justify;"><img style="display: block; margin-left: auto; margin-right: auto;" src="https://api-aps.aucegypt.edu/uploads/tinymce/1601480148image3.png" alt="" width="700" height="367" /><span style="font-size: 12pt;">آخر أرقام متاحة بتقول إن عدد الفقرا بقى أكتر من 30 مليون مصري. يعني تلت شعب مصر تحت خط الفقر</span><br /><span style="font-size: 12pt;">أهمية نسبة الفقر إنها برقم واحد ممكن تحكم على كل السياسات اللي بتنفذها الحكومة.</span><br /><span style="font-size: 12pt;">رقم ممكن يكون رد على معدل النمو. لأنه بيوضح إذا كان النمو كافي ولا لأ. وإذا كان مفيد لأغلبية المواطنين ولا لأ.</span><br /><span style="font-size: 12pt;">في حالة مصر، سواء النمو زاد أو انخفض، الفقر بيزيد كل سنة بقى له عشرين سنة.</span><br /><span style="font-size: 12pt;">الفقر زاد وقت مبارك، وقت الجنزوري، رغم ارتفاع النمو.</span><br /><span style="font-size: 12pt;">و زاد زيادة كبيرة بعد ما جت حكومة نظيف (حكومة رجال الأعمال، برعاية جمال مبارك).</span><br /><span style="font-size: 12pt;">الفقر برضه زاد وقت الثورة (مع تراجع النمو)</span><br /><span style="font-size: 12pt;">وزاد قبل برنامج صندوق النقد.</span><br /><span style="font-size: 12pt;">لكن أكبر زيادة في الفقر كانت بعد تنفيذ برنامج صندوق النقد في التلات سنين اللي فاتوا.</span><br /><span style="font-size: 12pt;">معدل النمو مش كفاية. مهم اننا كمواطنين نتأكد إن الحكومة خططت إن النمو يكون كافي، وان النمو جاي من كل القطاعات المهمة، زي الصناعة والزراعة والتكنولوجيا والخدمات الحكومية، زي التعليم والصحة والضمان الاجتماعي، والترع والطرق والمياه والصرف.</span><br /><span style="font-size: 12pt;">وإن القطاعات المتنوعة دي بتنمو بمعدلات عالية، وتؤدي إلى خلق وظائف كتيرة، وإن الوظائف دي تكون لائقة، يعني تكفل عائد كريم للي بيشتغل.</span></div>
<div dir="auto" style="text-align: justify;"><img style="display: block; margin-left: auto; margin-right: auto;" src="https://api-aps.aucegypt.edu/uploads/tinymce/1601480206image4.png" alt="" width="700" height="367" /></div>
<div dir="auto">&nbsp;</div>
<div dir="auto" style="text-align: justify;"><span style="font-size: 12pt;">اللي مش لاقيين ياكلوا في مصر زادوا مليون فرد في ثلاث سنوات.</span><br /><span style="font-size: 12pt;">الجائع= فرد بيضطر يصرف 490.8 أو أقل في الشهر-----&gt; بيكون تحت خط الفقر المدقع.. يعني تحت خط الفقر الغذائي</span><br /><span style="font-size: 12pt;">الجائع بيقطع من الإنفاق على أكله علشان يقدر يلبي احتياجات أخرى لا تقل ضرورة، زي فواتير الكهربا والمياه وزي الانتقالات.</span><br /><span style="font-size: 12pt;">في عام 2014، بدأت الحكومة برنامجين، تكافل وكرامة، موجهين للفقراء والجوعى وأصحاب الإعاقة. كان في مصر حوالي 5 مليون جائع في نفس السنة.</span><br /><span style="font-size: 12pt;">بعدها بسنتين ونص عدد الجوعى زاد إلى 6.2 مليون نسمة. </span><span style="font-size: 12pt;">لكن الجوعى مكانهم مش ثابت.. نقص عددهم نسبيا في ريف الصعيد وزاد نسبيا في المدن. </span><span style="font-size: 12pt;">ده ممكن يكون معناه إن السياسات الحكومية اللي بتوزع أكل مدعم، وفلوس، وبتتعاون مع الجمعيات الأهلية علشان توزيع الطعام في الصعيد عملت فرق إيجابي نسبيا. </span><span style="font-size: 12pt;">لكن الإجراءات الاقتصادية والاجتماعية اللي بتتسبب في الإفقار كانت أسرع وأقسى.</span><br /><span style="font-size: 12pt;">والنتيجة النهائية: زيادة نسبة الفقر المدقع وعدد الجوعى.</span></div>
<div dir="auto" style="text-align: justify;"><img style="display: block; margin-left: auto; margin-right: auto;" src="https://api-aps.aucegypt.edu/uploads/tinymce/1601480309image5.png" alt="" width="700" height="367" /></div>
<div dir="auto">&nbsp;</div>
<div dir="auto" style="text-align: justify;"><span style="font-size: 12pt;">الإنفاق على التعليم في مصر أصبح في أدنى مستوياته في التاريخ، وثلث مستوى إنفاق الدول النامية على التعليم </span><span style="font-size: 12pt;">وده بيحرمنا حتى من الحلول البسيطة زي أتوبيس مدارس مجاني أو برامج تعليم القراءة والكتابة المجانية اللي بتعمل فرق كبير. </span><span style="font-size: 12pt;">كل المصريين.. حتى الفقرا وغير المتعلمين بيدخلوا ولادهم المدارس، </span><span style="font-size: 12pt;">وبيتمنوا من ربنا انهم يقدروا يكملوا علشان يطلعوا أحسن منهم. </span><span style="font-size: 12pt;">فجأة، الأب يفقد شغله، أو يتوفى، أو حد من أولاده يمرض، </span><span style="font-size: 12pt;">فيضطر الابن أو البنت يسيبوا المدرسة لتوفير المصاريف. </span><span style="font-size: 12pt;">وخاصة إن الأولاد مش بيتعلموا كويس.. </span><span style="font-size: 12pt;">أو ببساطة الأولاد ينجحوا في إعدادي، لكن المدرسة الثانوي في قرية ثانية. </span><span style="font-size: 12pt;">دي قصة الفقرا في مصر مع التعليم.. مشوار قصير مبستر. </span><span style="font-size: 12pt;">لو مافيش تعليم مجاني جيد مافيش خروج برة دايرة الفقر والهشاشة.</span></div>
<div dir="auto" style="text-align: justify;"><img style="display: block; margin-left: auto; margin-right: auto;" src="https://api-aps.aucegypt.edu/uploads/tinymce/1601480455image6.png" alt="" width="700" height="367" /><span style="font-size: 12pt;">2 من كل 3 فقرا في مصر عايشين في الريف.</span><br /><span style="font-size: 12pt;">الفقر ما زال منتشر في الصعيد أكثر من وجه بحري وخاصة في ريف الصعيد. أكثر من نصف سكان الريف في الصعيد (52٪) عاجز عن تلبية حاجاته الأساسية من غذاء ومسكن وخلافه. </span><span style="font-size: 12pt;">فيه 12 مليون مصري ساكنين في أفقر 1000 قرية في مصر. من بين كل أربع أسر من سكان القرى دي فيه 3 عايشين تحت خط الفقر. يعني فيه 8 مليون فقير متركزين في 1000 قرية.</span><br /><span style="font-size: 12pt;">أهم مراكز تركز الفقر في الريف:</span><br /><span style="font-size: 12pt;">236 قرية في سوهاج يعني 87% من إجمالي القرى في سوهاج</span><br /><span style="font-size: 12pt;">207 قرية في أسيوط تمثل 88٪ من إجمالي القرى في أسيوط</span><br /><span style="font-size: 12pt;">163 قرية في المنيا، و155 قرية في البحيرة، و60 في قنا</span><br /><span style="font-size: 12pt;">تركز الفقر في مناطق جغرافية بعينها على مدى سنوات مش صدفة بل أكيد نتيجة سياسات الحكومة بتعملها أو مش بتعملها</span></div>
<div dir="auto"><img style="display: block; margin-left: auto; margin-right: auto;" src="https://api-aps.aucegypt.edu/uploads/tinymce/1601480517image7.png" alt="" width="700" height="367" /></div>
</div>
<p dir="rtl" style="text-align: justify;">&nbsp;</p>

Read Also